Hövzə Xəbər Agentliyinin verdiyi məlumata görə, İran İslam Respublikasının Elmi Hövzələrinin rektoru Ayətullah Əlirza Ərafi Bəhreyn hakimiyyətinin repressiv tədbirlərini və din alimlərinə qarşı təşkil olunan formal məhkəmə proseslərini pisləyən bəyanatının mətnini təqdim edib. Bəyanatda deyilir:
Bağışlayan və mehriban Allahın adı ilə
يَا أَيُّهَا الَّذِينَ آمَنُوا كُونُوا قَوَّامِينَ لِلَّهِ شُهَدَاءَ بِالْقِسْطِ وَلَا يَجْرِمَنَّكُمْ شَنَآنُ قَوْمٍ عَلَي أَلَّا تَعْدِلُوا اعْدِلُوا هُوَ أَقْرَبُ لِلتَّقْوَى وَاتَّقُوا اللَّهَ إِنَّ اللَّهَ خَبِيرٌ بِمَا تَعْمَلُونَ
Ey iman gətirənlər! Allah qarşısında (haqqı müdafiə edərək) möhkəm dayanın və ədalətlə şahidlik edin. Hər hansı bir dəstəyə qarşı bəslədiyiniz kin sizi ədalətsizliyə sövq etməsin. Ədalətli olun! Bu, təqvaya daha yaxındır. Allahdan qorxun. Həqiqətən, Allah etdiklərinizdən xəbərdardır. (Maidə surəsi, 8-ci ayə)
Allah peyğəmbərlərinin əsas missiyası ədalətin bərqərar edilməsi olduğu halda, Bəhreyn hakimiyyətinin son dövrlərdə həyata keçirdiyi tədbirlər yalnız ədalətsizlik çərçivəsini aşmaqla kifayətlənmir, həm də fundamental hüquqların kobud şəkildə pozulmasının və ümmətin hidayət yolunu müəyyənləşdirən dayaqlara birbaşa hücumun bariz nümunəsidir. Biz bu addımları siyasi səhv deyil, dinin və İslamın mövqeyini zəiflətməyi hədəfləyən məqsədyönlü repressiv siyasət hesab edirik.
2026-cı il fevralın 8-də Elmi Hövzələrin 60-dan çox tanınmış alimi, yüksək elmi dərəcəli müəllimi və nüfuzlu rəhbər şəxsi barəsində məhkəmə hökmlərinin çıxarılması, habelə bu ədalətsiz hökmlərin icrası üçün 2026-cı il noyabrın 8-nin müəyyən edilməsi şiələrin elmi və dini simalarına qarşı yönəlmiş açıq-aşkar sui-qəsddir. Heç bir şəri əsas və hüquqi legitimliyə malik olmayan bu formal məhkəmə prosesləri siyasi təzyiq göstərmək və dini azadlıqları pozmaq üçün istifadə olunan kobud vasitədən başqa bir şey deyil.
Möhtərəm alimlər, elmi hövzələrin müəllimləri, tələbələri və həmçinin elm və fəzilət sahibləri adından aşağıdakı məqamları xüsusi olaraq vurğulayırıq:
Birinci: Bəhreyn hakimiyyətinə ciddi xəbərdarlıq
Bəhreyn dövlətini və hakimiyyətini xəbərdar edirik ki, hazırkı yol beynəlxalq təcridə və beynəlxalq nüfuzun itirilməsinə aparır. Alimlərin hüquqlarının pozulması, dinə və məzhəbə qarşı yönəlmiş addımlar İslam cəmiyyətlərinin sabitliyinə və təhlükəsizliyinə qarşı yönəlmiş addımlardır. Bu tədbirlərin hər hansı şəkildə genişləndirilməsi Bəhreyn hakimiyyəti üçün nəzarətdən çıxacaq ağır siyasi və sosial nəticələrə səbəb olacaqdır.
İkinci: Təfriqə yaradan düşmənlərin rolunun ifşa edilməsi
Bu addımları İslamın və bəşəriyyətin düşmənlərinin, xüsusilə ABŞ və sionist rejimin həyata keçirdiyi mənfur və mütəşəkkil planların tərkib hissəsi hesab edirik. Bu hegemon rejimlər İslam ölkələrinin mərkəzində dini böhranlar yaratmaqla böyük Peyğəmbərin (s) ümməti arasında parçalanma salmağa və onun qüdrətini zəiflətməyə çalışırlar. Bütün İslam ümməti, eləcə də onun ziyalıları və elmi mərkəzləri bu cür fitnəkar və təfriqə yaradan fəaliyyətlərin qarşısında dayanmalıdırlar.
Üçüncü: İslam alimlərinin və əziz Bəhreyn xalqının müdafiəsi
Bəhreynin ziyalılarını, elmi və ictimai elitasını, görkəmli alimlərini müdafiə etmək, eləcə də məzlum və eyni zamanda qüdrətli xalqına dəstək göstərmək hər kəsin vəzifəsidir. Elmi Hövzələr də bu istiqamətdə üzərlərinə düşən vəzifələri yerinə yetirəcəklər.
Nəticə etibarilə:
Bir daha vurğulayırıq ki, Bəhreyn xalqının, gənclərinin və böyük alimlərinin hüquqlarını müdafiə etmək və qorumaq yolunda heç bir vasitədən geri çəkilməyəcəyik. Bu məsələnin bütün hüquqi və beynəlxalq mexanizmlər, eləcə də böyük İslam mərcələri vasitəsilə izlənilməsi davam etdiriləcəkdir. Əgər ədalət ədalətsiz məhkəmələrdə bərqərar edilməzsə, tarix qarşısında və Allah-Taalanın dərgahında mütləq bərqərar olacaq, xalqlar öz hüquqlarını, azadlıqlarını və ləyaqətlərini bərpa edəcəklər.
وَ مَا النَّصْرُ إِلّا مِنْ عِنْدِ اللهِ الْعَزیزِ الْحَکیمِ
Qələbə yalnız yenilməz qüdrət və hikmət sahibi olan Allah tərəfindəndir.
Ölkə üzrə Elmi Hövzələrin rektoru
Ayətullah Əlirza Ərafi
Rəyiniz